Het begunde der mit dat wie op verziede zollen.
Mor zo as wie aaltied doun noa t eten: eerst n rondje Eemskenoal-Opwierde.
Wie wazzen net op pad dou Hans wat strampelg begunde te lopen.
Wat der loos waas? Dikke toon dee hom zo zeer dat e nait gewoon lopen kon.
-Dij verrekte dikke toon van mie, zeker tegen toavel stöt–
Dus wie weerom noar hoes strampeln.

Din mor fietsen. n Rondje Schildmeer, dat haren wie aal n haile zet nait doan.
En t kon ja nog zat, zo wied was t ja nait.
Dikke toon gaaf gain last op fiets, versnellen van fiets wel.
Hans kon allent in de drij schoakeln en veur de wiend aan was dat gain probleem.
Hail veurzichteg perbaaide hai te schoakeln bie tegenwiend.
Zo veurzichteg dat ik aalgedureg rekende hou wied t weeromlopen was en of wie din ook nog op tied veur onze veziede weden zollen.
t Schoakeln gaf gain probleem en storig aan kreeg ik oog veur zun dij rad omdeel kwam.
Bie t meer was n fotoclubke aan loop mit zunsondergaang en de zulvern schitter op t meer.
Wie mit onze ainvoudege camera’s konnen t ook nait loaten om zun eevm op stee te holden.

t Was zo’n beedje haalfweg van ons rondje dochten wie.
t Wuir loater en loater en wie fietsten haarder en haarder en zun zakte gaauwer en gaauwer.
Op drijkwart van t rondje wozzen wie dat we nait op tied weerom weden zollen.
k Haar mien mobiel nait mit, wie wollen ja allint mor eevm lopen.
t Leste endje genoten wie nait meer van omgeven mor wazzen wie aan loop mit lampkes of dij t wel of nait deden en hou veul loater wie op stee weden zollen.

Laag t aan ons tempo dat we der zo laank over deden?
Schildmeer kon t nait helpen, dij laag der krekt as aaltied bie en waas nait groder gruid.
Poesterg en waarm kwammen wie bie onze laive minsen dij achter de kovviepot zaten.
Zulf haren ze nog gain drup had, wie zollen der ja zo weden kinnen.
t Haile verhoal kwam der oet en nee wie dronken gain kovvie meer of t ook thee weden mog.

Dat wuir ain kop thee, dou haren wie zin aan wat aans.
Dat wat aans smouk goud en hapkes krekt zo.
Mit fiets aan haand kwammen wie thoes en sluipen as rooskes.
Dag noatied dee dikke toon nog aal zeer en kop ook n hail luk beedje.